Diary
May 2026
Before Sunrise
“Well, I kind of see love as this escape for two people who don’t know how to be alone. It‘s funny, people always talk about how love is this totally unselfish, giving thing, but if you think about it, there’s nothing more selfish.”
Rain Man
Definitely great movie, great performance, great due, Hoffman’a portrayal of autism is so accurate.
The Teachers' Lounge
الفيلم ده بالنسبالي واحد من أقوى التجارب اللي شفتها مؤخرًا. القصة في ظاهرها تبان بسيطة عن مدرسة جديدة بتحاول تثبت براءتها وتدافع عن نفسها في وسط أجواء مليانة شكوك وصراعات داخل المدرسة. بس اللي المخرج عمله هنا إنه حوّل حاجة بسيطة لدراما تشد أعصابك. من أول لحظة في الفيلم حسيت إن فيه توتر بس آخر ٤٠ دقيقة كانوا حاجة تانية خالص ده الجزء اللي الفيلم وصل فيه لأعلى نقطة توتر، كل مشهد كان بيزود الضغط والتوتر بشكل يخليك مش قادر تشيل عينك من علي الشاشة. اللي يستاهل تحية كبيرة كمان الاطفال اللي جسدوا طلاب المدرسة. خصوصاً شخصية “أوسكار” الولد أداءه مبهر وبيمثل السهل الممتنع عجبني أداءه جداً وقدر يشدني في كل المشاهد اللي ظهر فيها خصوصاً النص الاخير من الفيلم. نيجي بقى لليوني بينيش (كارلا) ببساطة ممثلة تقيلة. قدمت دور معقد مليان صراع داخلي بين المثالية والواقع، بين إنها عايزة تعمل الصح وبين إن الدنيا كلها واقفة ضدها. طبعاً دي تاني تجربة ليا معاها من بعد التحفة (Late Shift) اللي بعتبره افضل فيلم نزل في 2025. وهنا اثبتتلي اكتر اني قدام ممثلة تقيلة درامياً جداً. فيلم عظيم وأكيد مش اخر تجربة ليا في السينما الألمانية. ⭐️⭐️⭐️⭐️
The Life of Chuck
“It’s not about how long we live, but how deeply we impact the lives of others.”💙
Little Fish
“I was so sad the day I met you, I can’t remember why.”
Prisoners
Absolute Cinema.
A Time to Kill
المرافعة الأخيرة من أعظم المشاهد اللي ممكن الواحد يشوفها في السينما. المشهد مش مجرد كلام محامي في قاعة محكمة لكنه لحظة إنسانية بحتة بتوريك قد إيه العدالة ممكن تكون عمياء لو محطتش نفسك مكان الضحية. طريقة بريجانس في وصف الواقعة كانت مؤثرة جداً بكل تفاصيلها كل كلمة قالها كسرت قلبي وخلتني احس اني مش مجرد متفرج لكن عضو حقيقي في هيئة المحلفين عايش المأساة معاهم. المشهد خلاني أدمع غصب عني لانه عبقري وصعب بشكل محدش يتوقعه. في النهاية فيلم عظيم فشخ ويستاهل تضيع ساعتين من يومك علشانه.
Sentimental Value
“SENTIMENTAL VALUE” اسم علي مسمي
Perfect Days
“المرّة القادمة هي المرّة القادمة… أمّا الآن، فهو الآن” الفيلم في الظاهر بسيط جدًا في فكرته، وأحداثه تبدو روتينية، لكن المفاجأة إنّي استمتعت بيه جدًا ومحستش بالوقت نهائي. اندمجت طول الساعتين كأني بتفرج على فلوج يومي لحياة “هيراياما”. جو الفيلم هادي ودافئ، بكادرات وألوان مريحة، والأغاني فيه كانت عنصر أساسي في خلق إحساس الهدوء والراحة. أول ما الأغنية بتشتغل، بحس إني انفصلت معاه عن العالم كله. اللي شدّني أكتر هو قرب الفيلم منّا كبشر. شُفته بيحكي عن الدوامة اللي عايشين فيها يوميًا: نصحى، نلبس، نخرج لشغلنا أو دراستنا، ونسلي وقتنا في الطريق بأغاني بنحبها علشان نهرب من الضغط. نفصل بفطار سريع، نكمل يومنا، نرجع نتغدى ونرتاح شوية يمكن نسمع موسيقى أو نقرأ حاجة بنحبها وبعدين ننام ونكرّر نفس الروتين من جديد. الإحساس ده خلاني أحس بقربي من الشخصية، وكأني عايش معاه نفس التفاصيل. أداء كوجي ياكوشو كان مثال للـ“سهل الممتنع”: شخصية هادية، رزينة، بتشوف الحياة بجمالها البسيط، ومهتمة بتفاصيل شغلها رغم تكراره اليومي. وبرغم قلة الكلام في الفيلم، إلا إنه بنظراته وتعبيرات وشه قدر يوصل مشاعره بأقوى شكل ممكن، ويمكن ده من أكتر الحاجات اللي أثرت فيا. باختصار، فيلم ممتع وعظيم بطريقته الخاصة. تجربة إنسانية دافية بتخلّيك تحس وتفكر، وتعيد النظر في التفاصيل اليومية اللي إحنا ساعات بنعدي عليها من غير ما نحس. مبسوط جدًا إني خضت الرحلة دي، وأكيد هرجع أعيده تاني بعد فترة.
Rye Lane
فيلم جميل فشخ ومميز في عشوائيته، بجرعة كوميدية لذيذة جدًا. بصراحة دي أول مرة أسمع عنه، ولقيته بالصدفة عن طريق ChatGPT وأنا بدور على فيلم خفيف يسليني، وكان اختيار مثالي فعلًا. الفيلم فوضوي حبتين، بيحكي عن شخصين اتقابلوا بالصدفة في معرض لواحد صاحبهم في لندن، وقرروا يقضوا اليوم مع بعض وسط مشاكلهم ومغامراتهم. الكيمياء بين ديفيد جونسون وڤيڤيان أوبارا كانت حلوة فشخ، باين عليهم إنهم على طبيعتهم جدًا، وده خلا كل حاجة طالعة منهم صادقة وسلسة. أحلى حاجة في الفيلم إن المواقف الكوميدية كانت طالعة بعفوية من قلب الموقف نفسه، من غير افتعال، فكان مستحيل متضحكش. عمومًا فيلم لذيذ جدًا، خفيف على القلب واستمتعت بكل دقيقة فيه.
The Land
الأرض لو عطشانه نرويها بدمانا عهد وعلينا امانه هتصبح بالخير مليانه طول عمري أسمع إن فيلم الأرض واحد من أعظم الأفلام في تاريخ السينما المصرية والنهارده فهمت ليه. الفيلم مقتبس عن رواية عبد الرحمن الشرقاوي، وبيمثل ذروة السينما الواقعية السياسية في مصر واختاروه ضمن قوائم أفضل الأفلام العربية والمصرية في أكثر من تصنيف نقدي. الفيلم متكامل بشكل نادر الموسيقى التصويرية، كادرات التصوير، التمثيل، والإخراج كل عنصر فيهم خدم الحالة الإنسانية والسياسية اللي الفيلم بيطرحها من غير أي افتعال. يوسف شاهين هنا مش بس بيحكي قصة هو بيبني ملحمة بصرية عن علاقة الإنسان بأرضه، وعن القهر، والمقاومة، والثمن. اختيار محمود المليجي في دور "محمد أبو سويلم" واحد من أعظم اختيارات التمثيل في تاريخ السينما المصرية. أداء جبار بكل معنى الكلمة. تقمص شخصية الفلاح المصري المقهور والعنيد في نفس الوقت بشكل يخليك تتأكد إن الدور ده اتكتب علشانه. نادر جدًا انك تشوف ممثل واحد عنده العدد ده من الـ Master Scenes في فيلم واحد. مشهد النهاية والسلطة بتقبض عليه وبيتسحل وهو مربوط بالحبل وبيتم سحبه على الأرض. المشهد ده قوي فشخ ورمزي حتى وهو بيتسحل إيده متمسكة بالأرض وده بيدل على تمسكه بحق الفلاحين في أرضهم رغم الظلم. أداء لو كان في سينما غربية، كان هيبقى مادة خام للجوائز العالمية بدون نقاش. باقي الكاست كان على نفس القدر من الاداء : عزت العلايلي، صلاح السعدني، حمدي أحمد، توفيق الدقن، نجوى إبراهيم كل واحد فيهم قدم أداء صادق وغير مبالغ فيه. الشخصيات حقيقية شبه ناس شوفناهم ونعرفهم وده سر قوة الفيلم. نهاية الفيلم مأساوية لكنها منطقية وقاسية زي واقع الفلاح المصري في ثلاثينيات القرن العشرين وهو بيدافع عن أرضه ضد الإقطاع والسلطة. “الأرض” مش مجرد فيلم سياسي أو اجتماعي، ده رمز سينمائي عن الجذور، والانتماء، والكرامة. فيلم بيثبت ليه يوسف شاهين ليومنا واحد من أهم المخرجين في تاريخ السينما العربية، وليه “الأرض” لحد النهارده بيتصنف كواحد من أعظم ما أُنتج في السينما المصرية. تقييم: 10/10
I Swear
الفيلم مستوحى من قصة حقيقية عن جون ديفيدسون، اللي ظهرت عليه في طفولته أعراض متلازمة توريت، واللي بتخليه يشتم أو يعمل حركات لا إرادية من غير تحكم. في الفترة دي مكنش حد تقريبًا فاهم يعني إيه متلازمة توريت وكان أغلب الناس فاكرينه بيتصرف كده بقصد أو قلة تربية. الفيلم بياخدنا في رحلة إنسانية مؤثرة في حياة جون، وطريقة تعامل المجتمع معاه من رفض وسوء فهم لحد تقبل ودعم القريبين منه. تجربة بتوجع وبتلمس خصوصًا إنها بتخلينا نفكر إزاي الناس اللي عندها اختلافات نفسية أو عصبية بتدفع تمن جهل المجتمع. اللي لمسني أكتر إن الفيلم خلاني حابب أعرف أكتر عن متلازمة توريت نفسها وعن المصابين بيها وإزاي الناس بتتعامل معاهم في زمننا الحالي خصوصًا إننا عايشين في عصر المفروض إن كل حاجة فيه بقت معروفة. تمثيليًا، روبرت أرامايو قدم أداء جبار ومقنع لدرجة إن في مشاهد كتير صدقت فعلًا إنه مصاب بالمتلازمة في الحقيقة ومش بيمثل. كمان سكوت إيليس اللي لعب دور جون في طفولته، كان متمكن بشكل مبهر. رغم إن ظهوره حوالي نص ساعة بس إلا إنه قدم أداء تاريخي وصعب يتنسي. في المجمل، الفيلم دراما اجتماعية إنسانية من العيار التقيل، مؤثر جدًا، ساعتين في قمة المتعة والتأثر. حاسس إن الفيلم ده هيفضل معلق معايا فترة طويلة، وهيكون واحد من أفلامي المفضلة دايماً.
Sore: A Wife from the Future
“Even If I get to start over hundreds of times, I’ll always choose you.” 🔁🤎
Rental Family
فيلم إنساني اجتماعي مؤثر جدًا، بيحكي عن ممثل أمريكي عايش في طوكيو وبيمر بحالة فقدان معنى واغتراب. الظروف بتقوده يشتغل مع وكالة يابانية غريبة من نوعها، متخصصة في “تأجير العائلات”، ودوره إنه يجسد شخصيات بديلة لناس ميعرفهمش: أب، زوج، قريب، أو حتى مجرد حضور إنساني ناقص في حياة حد تاني. مع كل دور فيليب بيقدمه الفيلم بيغوص أكتر في فكرة الوحدة، الاحتياج، ومعنى الانتماء، وبيكشف قد إيه التواصل الإنساني حتى لو كان مؤقت أو متفق عليه ممكن يسيب أثر حقيقي ومهم. الفيلم مليان لحظات إنسانية هادية، بعضها دافي وبعضها موجع، وكل علاقة ليها أثر واضح. أكتر خط لمسني كان خط ميا وابوها، كمان خط كيكو بالرغم من بساطته الا انه صادق ومؤثر جداً. برندان فريزر كان هادي ومقنع من غير أي افتعال، وحسيت إن الدور ده من الحاجات اللي بتأكد إنه رجع يختار أدواره بشكل صح. الفيلم مش معتمد على أحداث كبيرة، لكن على مشاعر وتفاصيل صغيرة بتوصل للقلب بسهولة "Rental Family" فيلم جميل وتجربة إنسانية تستاهل تتشاف. ❤️🗻
Holy Spider
أول تجربة للسينما الإيرانية وبصراحة اشتريت
The Salesman
أنا وقعت في غرام السينما الإيرانية 🇮🇷♥️
Bugonia
«هل نحن وحدنا؟» بصراحة كنت متردد فشخ أتابع الفيلم بسبب الآراء المتضاربة عليه، وخصوصًا إني مش من محبين الأفكار المريضة الممزوجة بالجنس اللي لانثيموس متعود يقدمها في أغلب أعماله. بس اللي شجعني فعلًا إني أدي الفيلم فرصة هو ترشحه للأوسكار وحقيقي كان يستاهل المشاهدة. لانثيموس المرة دي ما انجرفش ورا هوسه المعتاد بالعكس قدم فكرة جديدة سوداوية مليانة توتر وغموض في أجواء مشدودة وسينماتوغرافي من العيار التقيل ده غير الموسيقى اللي كانت عنصر أساسي في التجربة وبتسحبك جوه العالم ده وتزود الإحساس بالقلق مع كل مشهد. الفيلم عجيب وغريب، وكل مشهد حواري بين جيسي بليمونز وإيما ستون التوتر فيه بيزيد أكتر. الحلو إنك طول الفيلم تايه: مش عارف الحقيقة فين، مش عارف تنجرف ورا نظريات المؤامرة اللي تيدي مؤمن بيها ولا تمشي ورا المنطق والواقع اللي بيقول إن الكلام ده مستحيل خصوصًا إن الإنسان بطبعه رافض فكرة الكائنات الفضائية. لحد ما تيجي النهاية وتصدمك. النهاية ممتازة ومفاجئة إلى حد كبير حتى لو كنت شايف إنها كان ممكن تتكتب بشكل أقوى شوية بس ده ميمنعش إنها قفلت القصة بشكل كويس جدًا. الأداءات التمثيلية كانت جبارة وخصوصًا جيسي بليمونز متوقعتش الأداء ده منه أبدًا ويمكن دي أحسن مرة شوفته على الشاشة كان متمكن من الدور ومستفز بشكل مش طبيعي وقدر يقنعني تمامًا إنه شخص مختل في مواقف كتير. وطبعًا إيما ستون مفيش غبار على أدائها السهل الممتنع ولسه شايف إن ثنائيتها مع لانثيموس هي أنجح تعاون في مسيرتها. في النهاية، BUGONIA فيلم عميق وسوداوي، وبالنسبالي واحدة من أفضل تجارب إيما ستون في آخر كام فيلم قدمتهم.
Hamnet
“To be, or not to be… that is the question.” 🎭 من أكتر التجارب السينمائية اللي أثرت فيا في آخر فترة ويمكن أحسنهم. فيلم تقيل، سوداوي، تراجيدي وموجع من أوله لآخره. طول الفيلم وأنا حاسس بمشاعر متلخبطة: حزن، ألم، انكسار، شوية فرح كده على خفيف، وكآبة مسيطرة على كل حاجة، فيلم بيشدك معاه ويخليك تحس بكل لحظة وجع الشخصيات بتحسها. Hamnet مش مجرد فيلم بل تجربة شكسبيرية خالصة تحس انها مسرحية من كتر ما انت عايش المأساة والوجع مع آغنيس وويليام. بول ميسكال في دور ويليام شكسبير قدم أحسن أداء في مسيرته من وجهة نظري. قوة، غضب مكتوم، وحيرة بين حلمه ككاتب وبين كسرته كأب فقد ابنه. الأداء كان صادق جدًا الراجل طلع كل اللي جواه في الدور ده تحديدًا وبصراحة مش فاهم إزاي الدور ده معداش على الأوسكار بس ما علينا. نيجي لجيسي باكلي بقى… دي لوحدها فيلم. أداء تقيل ووجع حقيقي اتخلق من رحم المعاناة، عينيها كانت بتحكي كل حاجة من غير ما تتكلم. باين على الشخصية إنها شايلة كتير من صغرها من وقت ما فقدت أمها والوجع ده كمل بعد سنين بخسارة ابنها هامنت. الأداء كان بسيط، هادي، اغلبه نظرات صامتة بس مؤلم جدًا وأعتقد الأوسكار مضمونة ليها بنسبة كبيرة جداً بفرق واضح عن منافسيها. الطفل اللي لعب دور هامنت رغم ظهوره القليل الا إنه كان ممتاز ومؤثر جدًا. حضوره خفيف، لكن غيابه كان تقيل طول الفيلم وده في حد ذاته نجاح كبير. الأداءات عمومًا كانت ممتازة، حتى لو في كام مشهد حسيت إن التمثيل زاد شوية عن اللزوم بس ده طبيعي في فيلم معتمد على الحالة النفسية والانفعال أكتر من أي حاجة تانية. من ناحية السينماتوغرافي الفيلم جميل جدًا. الملابس، البيوت، والطبيعة الخضرا كلها تحسسك إنك عايش في الزمن ده بجد. كل حاجة كانت بسيطة بس معمولة بحرفية شديدة، والموسيقى التصويرية كانت دايمًا في مكانها بتكمل الإحساس دة من غير ما تفرض نفسها. يمكن السلبية الوحيدة اللي حسيت بيها بوضوح في الفيلم هي القفزات الزمنية. الأحداث كانت ماشية كأنها في خط واحد متواصل مع إن فعليًا القصة بتمتد على سنين. لولا إن الأطفال كبروا قدامي على الشاشة مكنتش هحس إن وقت طويل عدى. كنت أتمنى الفيلم يدي مساحة أكتر لإحساس مرور الزمن، ونشوف تطور أو تغير في الشخصيات مع السنين اللي عدت. نهاية الفيلم "مشهد المسرحية" كانت الضربة القاضية بالنسبة لي. مشهد يوجع القلب من غير صريخ واڤورة مجرد نظرات من آغنيس وهي بتتفرج كأنها شايفة ابنها بعد ما كبر كانت كفاية تكسر قلبي كمشاهد. كل إحساس متراكم طول الفيلم طلع في اللحظة دي. لحد ما يتقفل المشهد على موسيقى "On the Nature of Daylight" اختيار ذكي فشخ بصراحة، موسيقى هادية بس بتوجع تدخل في قلبك بهدوء وتكمل إحساس الوجع في المشهد بكل بساطة مع الصمت والنظرات، وكأن الموسيقى كانت القطعة الناقصة علشان المشهد يكمل ويتقفل القفلة الصح. تتر النهاية نزل وأنا فضلت قاعد مكاني مش قادر أتحرك حاسس بغُصة ووجع كأني أنا كمان فقدت حد، إحساس تقيل فضل معايا شوية بعد ما الفيلم خلص. الأكيد ان Hamnet واحد من أفضل أفلام 2025 دة لو مكنش أفضلهم فيلم عن الفقد، الوجع، والحلم اللي بيتخلق من قلب المعاناة. فيلم بيخلص بس أثره بيفضل جواك.
